اسمى محمد حسام و طبعا واضح ان اسم الشهرة اصبح بقدرة قادر ” حسام ابو تريكة ” و ده له حكاية
بس مش هو اسم الشهرة الوحيد او اسمى ع النت الوحيد فى اسماء تانية منها redbazock مش عارف كنت بحب الاسم ده و سجلت بيه فى منتديات كتير و اسم تانى برده هو dr.7ob و برده ده كان فى منتديات كتير منها ترايدانت و ده كان من موقع حب زمان اللى كان عندى قبل ده و فى اسماء اللى كانوا بيقولوهالى صحابى و جيرانى فى المنطقة ” الحته بتاعتنا يعنى ” 
زى حبكشة و له قصه برده و زى هركليز مش عارف يمكن اكون شبه بالشعر الاصفر و العيون الخضرا لول
مصرى و ابويا مصرى و فخور بده جدا .. مش عارف حاسس ان فى مصريين كتير مش فخورين ب ده بس فرحان بيه قوى احنا المصريين مهما مر الزمن مسحنا كلمة مستحيل من قاموسنا الخاص و عبرنا باريف و حطمنا الاسطورة الواهمة
مخلص دراسه و الله الواحد مش عارف هى الدراسة بتخلص العلم مالوش حد نقف عنده الواحد هيتعلم لحد ما يموت
بعشق سورة يس و بحب اسمعها جدا
اهلاوى بس مش متعصب خلاص يعنى فاتت المرحلة ديه كان زمان و كان الواحد هيبطل يشجع كورة لولا ماتش ال6:D
نفسى اتعلم رياضات كتير يمكن الواحد بدء سباحة و ركوب خيل و ربنا يكرم ان شاء الله و نتعلم الرماية و ارخص سلاح عشان اللى ميعجبنيش ارفعه
بتعلم حاليا php و نفسى اعمل اول اسكريبت و ربنا يكرم ان شاء الله و يكون حاجه زى الفل بالصلاة على النبى
سبحان الله الواحد مبيتعلمش ببلاش فعلا يعنى عملنا مشروع التخرج ب asp و بعد كده سبنها و قعدنا نلعب و نسينا الليلة دى كلها و بعد كده راجعين نقول ظلموه
نجمى خفيف
بحب الناس و احب اعمل صداقات جديدة و اتعرف و اتعامل مع كل الناس و ده على فكرة موضوع صعب جدا يعنى ان الواحد يعرف يتعامل مع مختلف نوعيات البشر او يعرف يخاطب كل طبقات فكر البشر موضوع فى غاية الصعوبة الواحد ميدعيش انه بيعرفه
لكن الواحد بيحاول و بقول بحاول يعنى مفيش قاعدة ثابته فى قواعد اكيد بس احتمال التغيير موجود باستمرار :S
و فعلا الواحد مبيتعلمش ببلاش و فعلا نفسى اتعلم كل حاجه